其實褂嚟講我都係比較鐘意傳統褂，之前有去過一啲婚紗鋪睇褂不過質素就好參差，睇褂一定要去返傳統褂鋪，我無去過冠南華，淨係去過油麻地上海街嘅永隆刺繡，無論款同價錢都係我心水，加上老闆娘張太超好人，試咗幾套就爽快決定！
上次做訪問同張太傾開，揀褂係要睇膚色同身型，唔係人著褂皇你就一定要著！好似身型高大嘅女仔多數要揀平腳，因為水波腳比較啱瘦同細粒嘅女仔；如果身形較有肉地嘅就應該著清啲，唔好咁多刺繡，因為越密就顯得越大隻越肥；如果你皮膚偏白就當然可以揀金線越多啦，相反皮膚黑就要襯紅多啲喇！
張太仲話依家嘅傳統褂用咗拉鏈設計可以令新娘睇落修身啲，而手袖亦唔會好似以前咁長，中長袖款可以令我哋視覺比例睇落更修長！仲有傳統褂上面嘅刺繡有牡丹、龍鳳、鴛鴦、原來仲有蝙蝠！我一路以為蝙蝠路係吉祥物，原來蝙蝠係有金錢寓意，係好嘢嚟架🙈
仲有可能係我無咩所謂關係，我無問過啲褂係第幾手，講真出去租婚紗都唔知比人著過幾多次啦，何必在意！加上呢啲都係商業手法，咁care不如俾錢造條全新俾自己喇！
www.lollyko.com 